பள்ளியுடன் தொடர்புடைவர்

‘அல்லாஹ்வின் (அர்ஷின்)நிழலைத்தவிர வேறு எந்த நிழலும் இல்லாத கியாமத் நாளில் அல்லாஹ் தனது(அர்ஷின்) நிழலில் ஏழு பேருக்கு நிழல் வழங்குவான்  அதில் 3 ஆம் நபர்  இறை இல்லங்களுடன் அதீத தொடர்புக் கொண்ட மனிதர்

மறுமையில் நிழல் பெறும் மூன்றாம் மனிதர் பள்ளியுடன் அதிகத் தொடர்பு வைத்திருப்பவர் என்பதன் அர்த்தம். அவர் பள்ளியை விட்டு எப்போது  வெளியில்  சென்றாலும் மீண்டும் பள்ளிக்கு வருவதையே எதிர்பார்த்துக் கொண்டிருப்பவர். “ஒரு மீனை நீரை விட்டு வெளியேற்றினால் அது மீண்டும் தண்ணீரில் செல்வதை தேடுவது போல் ஒரு முஃமின் பள்ளிக்கு திரும்பி வருவதையே எதிர்பார்த்துக் கொண்டிருப்பார். நயவஞ்சகன் பள்ளியில் இருப்பதைக் கூண்டுக்குள் பூட்டப்பட்டக்  கிளி, எரிச்சலுடன்  இருப்பதைப்  போல்  பள்ளியில் இருப்பதை உணர்ந்து, பள்ளியை விட்டு விரைவாக வெளியில் செல்லவதை  விரும்புவான்”.  (இர்ஷாதுஸ்ஸாரி ) 

அல்லாஹ்வின் இல்லமான பள்ளியுடன் ஒரு முஃமின் தொடர்பு வைத்துக் கொள்ள வேண்டும். இத்தொடர்பு இறையச்சத்துடன் கூடிய இதயப்பூர்வமானதாக அமைய வேண்டும். ஒரு தொழுகையை நிறை வேற்றி விட்டு, அடுத்தத் தொழுகை நேரத்தை எதிர்பார்த்து அமர்வதும் , அல்லாஹ்வின் இல்லம் சென்று அவனுடன் உரையாட ஆவல் கொள்வதும், அங்கு நடைபெரும் மார்க்க விளக்க சபையில் கலந்துக் கொள்ள ஆர்வம் கொள்வதும்  இச்சிறப்பில் கட்டுப்பட்டதாகும். (துஹ்ஃபதுல் அஹ்வதீ 7/58)

பள்ளியுடன் தொடர்புக் கொண்டவர் தொழுகையின் பாங்கு சப்தத்தைக் கேட்டு விட்டால் உடனடியாக அதற்குத் தயாராகிறார். பள்ளிக்கு ஆசையுடன் வீட்டில்  ஒழு செய்து கொண்டு நடந்து முன்கூட்டியே தொழுகையை எதிர்பார்த்து அமர்ந்தவராக, அங்கு அல்லாஹ்வின் வேத வசனங்களை ஓதிக் கொண்டும், அல்லாஹ்விடம் பிரார்த்தனை செய்வதற்கும் வாய்ப்பும்  ஏற்படுகிறது.  இவை ஒவ்வொன்றுக்கும் நபி மொழியில் பல சிறப்புகள் கூறப்பட்டுள்ளன.இவர் பள்ளியுடனான மானசீக தொடர்பு என்ற  ஒரு நற்செயலினால் பலவிதமான நன்மைகளைச் செய்து கடமையான தொழுகைக்காக நிற்கும் பொழுது எண்ணிலடங்கா பாவங்கள் மன்னிக்கப்பட்ட நிலையில் மனத்தூய்மையோடு அல்லாஹ்வுடன் உரையாடுவதற்கு வாய்ப்புகள் கிடைக்கின்றன.  (ஷரஹ் ரியாழுஸ் ஸாலிஹீன் -இப்னு ஹதிய்யா 21/7)

பள்ளியோடு அதீத தொடர்புடையவர் ஜமாஅத் தொழுகையில் பேணுதலாக இருப்பார். இதன் காரணத்தினால் அவரது ஒரு தொழுகை 27 மடங்கு நன்மை கிடைப்பதற்குக் காரணமாக அமைந்து விடும். அவ்வாறே தொழுகையை எதிர்பார்த்து அமர்வதினால் வானவர்களின் பிரார்த்தனையும் அவருக்குக் கிடைக்கின்றது.

 ரபீயா இப்னு யஸீத்(ரஹ்) கூறுகிறார்கள்: “நான் 40 வருடங்களாக பள்ளியில் தொழுகைக்காக அழைப்பாளர் பாங்கு சொல்வதற்கு முன்பே சென்று விடுவேன். ஏதேனும் நோய் அல்லது பிரயாணத்தினால் அது தவறிவிடும்”.

அப்துல்லா ஈஸா உஸைரீ  என்ற பெரியவர் சிறுபிராயத்திலிருந்து 76 வயது வரையிலும் தொழுகைக்கு இளமை, முதுமை, வயோதிகம், அனைத்து நிலைமைகளிலும் உறுதியான நம்பிக்கையோடும் ஆர்வத்தோடும் பள்ளியில் சென்று தொழுவதை கடைபிடித்து வந்தார்.  தனது முதுமைக் காரலத்தில் தவண்டவராக  பள்ளிக்கு செல்வார். கடுமையினா உஷ்ணத்தினால் அவர் செல்லும் வழியில் விரிப்புகள் விரித்து சென்றிருக்கிறார். வெள்ளிக்கிழமையென்று ஜும்மா தொழுகைக்கு சுமார்  3  கிலோமீட்டர் தவண்ட நிலையில் சென்றுள்ளார் என குறிப்புகள் கிடைக்கின்றன.  (கிதாபுல் மஸாஜித் புயூதுல்லாஹ் 25-35)

இஸ்லாத்தின் பார்வையில் பள்ளியை வெறும் தொழுகைக்குறிய இடமாக மட்டும் கருதுவதில்லை. மாறாக இஸ்லாத்தின் முழு கலாச்சாரத்தையும் போதித்து நடைமுறைப்படுத்தும் மையமாக அது பார்க்கிறது. முஸ்லிம்களின்  உள்ளங்களை ஒற்றுமைப்படுத்துதல்,  இஸ்லாமிய அடையாளச் சின்னங்களை பாதுகாத்தல், பரப்புதல், முஸ்லிம்களை ஒரே வரிசையில் நிற்கவைத்து  உள்ளத்தாலும் உடலாலும் ஒன்றித்து வாழும் சூழல் உருவாக்குதல், அங்கு இஸ்லாமிய கொள்கைகளையும்  மார்க்க சட்டங்களையும்  போதித்து அறியாமைக்காலக் கொள்கைகளையும், கலாச்சாரங்களையும், அடியோடு அகற்றுவதற்கும் பள்ளியே முக்கிய இடமாக கருதப்படுகிறது. இத்தகய முக்கியத்துவம் வாய்ந்ததாக பள்ளி இருப்பதினால் தான், நபியவர்கள் மதினாவிற்கு வந்த உடன் முதல் வேலையாக பள்ளியை கட்டி எழுப்பினார்கள். (கிதாபு ரஹ்மதுல் லில் ஆலமீன் 257 )

இந்த அளவிற்கு முக்கியத்துவம் வாய்ந்த பள்ளியை கடமையான தொழுகைக்குச் செல்வதோடு மட்டும்  நமது தொடர்பைச் சுருக்கிக் கொள்ளாமல், மற்ற நற்காரியங்களுக்கும் தொடர்பு வைத்துக் கொள்வோமாக!.