ثُمَّ اَنْشَاْنَا مِنْۢ بَعْدِهِمْ قَرْنًا اٰخَرِيْنَ ۚ فَاَرْسَلْنَا فِيْهِمْ رَسُوْلًا مِّنْهُمْ اَنِ اعْبُدُوا اللّٰهَ مَا لَـكُمْ مِّنْ اِلٰهٍ غَيْرُهٗ ؕ اَفَلَا تَتَّقُوْنَ
பின்னர், (பிரளயத்தில் மூழ்கிவிட்ட) இவர்களை அடுத்து வேறொரு தலைமுறையினரை உண்டாக்கினோம். அவர்களிலிருந்தே ஒரு தூதரையும் அவர்களிடையே நாம் அனுப்பினோம். “அல்லாஹ்வையே வணங்குங்கள்; அவனன்றி, உங்களுக்கு (வேறு) நாயன் இல்லை; நீங்கள் (அவனுக்கு) அஞ்ச வேண்டாமா?” (என்றும் அவர் கூறினார்.)
(வசனம் 31 – 43 வரை)
அல்லாஹுத்தஆலா இங்கிருந்து வேறொரு சம்பவத்தை கூற ஆரம்பிக்கிறான். நூஹ் நபி (அலை) அவர்களின் சமூகம் அழிக்கப்பட்ட பின் வேறொரு சமூகத்தை அங்கு தோற்றுவித்தான். அவர்களிடமும் தூதுவர்கள் வந்து அல்லாஹ் ஒருவனே வணங்கப்பட தகுதியானவன் அவனையின்றி வேறு எவரும் வணங்கப்பட தகுதியற்றவர்கள். எனவே அவன் அல்லாத மற்றவர்களை வணங்கினால் அல்லது அவனோடு மற்றவர்களை இணைவைத்தால் உங்களிடம் அவனின் (அல்லாஹ்வின்) வேதனை வந்துவிடும். இதை நீங்கள் அஞ்ச வேண்டாமா ? என்று கேட்டார்கள்.
அதற்கு அப்பகுதியில் வசித்து வந்த அதிகாரமுடைய செல்வாக்கு மிக்கவர்கள் அல்லாஹ்வையும், மறுமையையும் நிராகரித்து உலக ஆசைகளிலும் ஆடம்பரங்களிலும் மூழ்கிய மக்கள் பாமர மக்களிடம், தன்னை தூதுவர் என்று வாதிடுபவர் உங்களைப் போன்ற ஒரு மனிதரே. நீங்கள் உண்பதைப் போல் அவரும் உண்கிறார். குடிப்பதையே அவரும் குடிக்கிறார். உங்களைப் போன்ற ஒரு மனிதரின் சொல் கேட்டு நடந்து விட்டால் நீங்கள் நஷ்டவாளி ஆகிவிடுவீர்கள். எனவே அவர்களுக்கு வழிபட்டு விட வேண்டாம் என்று எச்சரித்தனர்.
மேலும் நீங்கள் இவ்வுலகில் வாழ்ந்து மரணித்த பின் மண்ணோடு மண்ணாகி எலும்புகலெல்லாம் மக்கிப்போன பின்பும் மறு உலக வாழ்விற்காக எழுப்பப்படுவீர்கள் என்றும் இவர் கூறுகின்றார். இவர் சொல்வதோ மிக மிக பாரதூரமான செய்தியாகும். நாம் கண்டவரை இவ்வுலகில் பிறக்கும் ஒவ்வொருவரும் முடிந்தவரை இவ்வுலக இன்பங்களை அனுபவித்து வாழ்ந்து மரணித்து விடுகின்றனர். அதற்குப் பிறகு ஒரு வாழ்க்கை இருப்பதாக நாம் கண்டதேயில்லை. எனவே நீங்களள் நம்பி விட வேண்டாம். இந்த தூதுவர்கள் என்று தங்களை வாதிடுபவர்கள் அல்லாஹ்வின் மீது பொய்யைப் புனைக்கின்றனர். எனவே நாம் அவர் சொல்வதை உண்மைப்படுத்தி விடக் கூடாது என்று கூறினர்.
இந்த செய்திகள் அனைத்தையும் செவிமடுத்து கொண்டிருந்த தூதுவர்கள் அல்லாஹ்விடம் பிரார்த்திக்க தொடங்கினர். எனது ரட்சகா ! அவர்கள் நீ வழங்கிய தூதுத்துவத்தை பொய்ப்பிக்கின்றனர். எனவே அவர்களின் மீது தண்டனை இறக்கி வைப்பாயாக என்றனர். இதனை ஏற்ற அல்லாஹ் மிக விரைவில் அதிகாலைப் பொழுதில் தங்களின் செயலினை நினைத்து கைசேதப்படும் வேதனை வந்தே தீரும் என்று கூறினான். அல்லாஹ்வின் அருளை விட்டும் விலகிச் சென்றதினால் உடனே அவர்களுக்கு பேரிறைச்சலை அல்லாஹ் இறக்கி வைத்தான் அதனால் அவர்கள் அனைவரும் நீரோடையில் நீரின் மேல் பரபரப்பில் மிதந்து செல்லும் (குப்பைகளைப்) அழுக்கான நுரைகளைப் போல் கேவலமாக அழிக்கப்பட்னர். تفسير المحرر
குறிப்புகள் :
இந்த சரித்திர தொடரில் ஊர் மக்களை சத்தியத்தை விட்டும் தடுத்தவர்களின் தலைவர்களின் மூன்று வித பண்புகள் கூறப்பட்டுள்ளன. 1 அல்லாஹ்வை இணை வைத்தல், நிராகரித்தல் 2 மறுமையை பொய்ப்பித்தல் 3 உலகமே வாழ்வாக எண்ணி வாழ்வது.
تفسير الرازي
இந்த வசனத் தொடரில் இதற்கு முன் நூஹ் நபி (அலை) அவர்களின் சரித்திரமும், இதற்குப் பின் மூஸா, ஹாரூன் (அலை) அவர்களின் சரித்திரங்கள் சொல்லப்படுகின்றன. எனினும் இவ்விரு சரித்திரங்களுக்கிடையில் தூதுவர்களின் பெயர்கள் கூறப்பவில்லை. இதற்கு காரணம் அச்சமூகம் புதிய சட்டதிட்டங்களை பெருவதற்கு தகுதியற்றிருந்தனர். மேலும் இதற்கு முன் அனுப்பப்பட்ட பெரிய தூதுவர்களின் சட்டதிட்டங்களின் படியே வாழ்ந்தனர் என்பதினால் அந்த தூதுவர்களின் பெயர்களை இடைப்பட்ட வசனங்களில் கூறப்படவில்லை. التحرير والتنوير
அல்லாஹ்வை மறுத்து வாழ்ந்த மக்கள் எவ்வளவு சுகபோக வாழ்வு வாழந்தாலும் அவர்கள் வாழ்ந்து சென்றதற்கான எவ்வித அடையாளங்களையும் விட்டுவைக்கவில்லை மாறாக அவர்களை பற்றி பிந்தியவர்களுக்கு பேச்சுப் பொருளாக மட்டுமே மற்றிவிட்டான். البحر المحيط